Änfach frei laafe geloss. Josef Peil

eich aach noch«, saht de Adam, unn domit harr er das Spiel. Wenn awei in de Blinne en Bauer leihe tät. Rechene konnt er domit jo nitt. Dass dann awer nor zwei Lusche drin ware, wo er gleich lei’e losse konnt, das hot em nitt so gut geschmeckt.

      Grad so wenich wie dass er noch käner gefunn hatt, de em aach nor hunnertachtzigtausend genn hätt. Es ware noch drei annere Häiser fäl im Dorf. Die junge Leit, falls se iewerhaupt geblieb sinn, harre entwere kä Geld ore selwer nou gebaut. Unn die Fremme, wo sich so Dinger leiste, die honn die groß Auswahl unn könne die Preise drücke.

      »Eich muss Grand spiele«, saht de Adam, unn de Kurt do druf ganz drucke: »Eich wäß das, awer vum-mer kriehst de Contra.«

      Dann hot de Kurt de Herzbauer uffgespielt unn dem Adam domit gleich de änziche Trump rausgezoh. Dorch en Fehler vum Ewald kam de Adam wiere ins Spiel unn hot e paar gure Stich gemach.

      Er hatt die Aue mitgeziehlt, unn beim Nohziehle am Schluss sinn’s aach nitt meh wor.

      »60«, saht de Kurt, »us langt das«, unn de Adam wusst, dass er froh wär, wenn er wie bei dem Spiel am Enn die Hälft kräächt.

      De Kurt hot die Karte zesammegeroff: »Dou bist am Genn!«

      Awer de Adam hatt kä Luste meh, for annere die Karte ze mische. »Eich mah nimmee, eich gehn häm«, sahr-er.

      »Bleib doch noch e bisje«, saht de Ewald unn hot das Thema angefang. Die Froh musst jo komme, wo de Adam Ängst devor hatt: »Unn wann ziehst de fort?«

      Do is de Adam weerklich uffgestann, unn im Fortgehn sahr-er: »Am liebste gar nitt.«

      Domit war das aach so: Die Hälft gewunn, for ihne war das verlor.