Die waarheid oor verhoudings. Stefan Blom

van hulle glo die woorde “Kom ons praat later daaroor” nie, want dit gebeur nie. Daardie oomblik wanneer jy iets te sê het, voel soos jou enigste kans – een waarvoor jy sal baklei. Wanneer die een sê: “Nie nou nie; ek is moeg” of “Kan ons later hieroor praat?”, is dit vir die meeste paartjies soos ’n rooi lap voor ’n bul. Dit is gewoonlik ook die einde van die gesprek, waarna een van julle dikwels verwaarloos en verwerp voel, al is dit nie so nie.

      Vrae oor jouself

      •Hoe kalmeer ek myself wanneer ek ontsteld is?

      •Hoe kan ek ophou om groter ontsteltenis in my verhouding te veroorsaak wanneer ek regtig ontsteld is?

      •Wat kan ek in ’n oomblik van ontsteltenis of woede doen om te kalmeer?

      •Hoe kan ek my gedagtes kalmeer wanneer ek ontsteld is?

      Stap 6: Besin oor julle persepsies van mekaar

      Die een ding wat dikwels in die pad staan van ’n kalm, nie-reaktiewe gesprek, is julle persepsie van mekaar. Dit blyk in ons aard te wees om een slegte ervaring te veralgemeen, en dan daaroor te praat asof die betrokke persoon altyd so is. As jy een keer oor een aspek van jou lewe gejok het, word jy ’n leuenaar wat glad nie vertrou kan word nie. As jy een keer woorde wat seermaak gebruik het, word jy ’n boelie of mishandelaar. Wanneer ons met vriende of familie oor die seermaak-ervarings in ons verhouding praat, voed en bevestig dit dikwels ons algemene negatiewe persepsies oor ons lewensmaat. Nes jy bevestig jou vriende ook jou algemene negatiewe opvattings oor jou lewensmaat en voed hulle jou persepsies.

      As mense is ons egter nie algemeen nie – ons is spesifiek. Ons is goed vir mekaar, en soms minder goed. Pasop dat jy nie een of twee spesifieke ervarings veralgemeen nie. Vertroue is nie iets wat heeltemal verbreek word nie – dit word net op ’n spesifieke terrein verbreek. Byvoorbeeld, ek vertrou jou miskien nie met geld nie, maar ek vertrou jou met ons kinders. Wees spesifiek oor die optrede wat jy nie wil hê nie en wat jy wil verander.

      Julle veralgemenende persepsies van mekaar kan tydens ’n meningsverskil of gesprek keer dat julle mekaar hoor en ’n kalm gesprek met begrip kan voer. Stellings soos “Jy doen dit altyd…” en “Jy sal nooit…” dui daarop dat jy veralgemenings oor jou lewensmaat maak. Selfs al steek daar waarheid in, kyk of jy oor jou algemene persepsies kan besin en jou lewensmaat se ander kant kan sien.

      Vrae oor jouself

      •Wat is my algemene sienings van my lewensmaat?

      •Watter van dié sienings verhinder dat ek hom of haar regtig sien?

      •Wat is die waarheid oor wie hy of sy regtig is?

      •Hoe beïnvloed my sienings ons interaksies?

      •Hoe kan ek my persepsies regstel en ophou veralgemeen?

      Stap 7: Skep ’n ruimte met respek vir ’n gesprek

      Net soos ’n voël ’n nes bou vir ’n delikate eier, is dit ’n goeie idee as jy ’n nes bou vir gesprekke waar jy sensitiewe onderwerpe gaan ophaal. Om so ’n nes te bou is om ’n konteks vir ’n gesprek te skep… ’n mooi ruimte wat jou nooi om ’n goeie gesprek te hê.

      As ’n beginpunt, is dit nie ’n goeie idee om te staan en gesels nie. Dit impliseer dat julle nie ernstig is oor die doel van die gesprek nie. Dit wys eerder dat julle op pad is iewers heen. Dit is die beste om te gaan sit as julle ’n ernstige gesprek gaan hê, want só gee julle vir mekaar en vir julle gesprek die respek wat julle en dit verdien.

      ’n Rusbank of tafel is ’n goeie plek om ’n gesprek te begin.

      Gaan sit op julle rusbank of by julle tafel en begin praat. Dit klink miskien eenvoudig, maar dit is nie – op daardie oomblik voel ons dikwels ontsteld of seergemaak. Onthou, elke keer as jy ontsteld voel of ’n meningsverskil het, is dit ’n uitnodiging om te praat. Deur jou lewensmaat te vra om by jou te kom sit en gesels, wys jy jy is ernstig oor julle verhouding en respekteer dit.

      Respekteer mekaar en julle verhouding deur alle elektroniese toestelle af te skakel of eenkant te sit. Geen paartjie kon nog ooit ’n suksesvolle gesprek voor ’n televisie of rekenaarskerm voer nie.

      Wanneer jy ’n elektroniese toestel aanskakel, skakel jy dikwels jou verhouding af. Die doel is om op mekaar en julle verhouding in te skakel. Dit is ook nie goed vir julle verhouding om elektroniese toestelle soos ’n televisie, selfoon of tablet na die slaapkamer te bring nie. Intimiteit en skerms werk nie goed saam in dieselfde ruimte nie; skerms moet uit die slaapkamer verban word.

      ’N OEFENING VIR JULLE VERHOUDING

      •Noem die plek waar julle graag ’n gesprek met mekaar wil hê.

      •Vertel vir mekaar hoekom julle verkies om julle gesprek op dié plek te hê. En belowe om mekaar in dié ruimte in te nooi wanneer julle aangedui het dat julle wil praat.

      Sodra julle aangedui het dat julle wil praat en ’n veilige en gemaklike ruimte daarvoor geskep het, begin praat. Julle is nou gereed om te sê wat julle op die hart het.

      Hoofstuk 2

      deel jou waarhede (eerlik en met sorg)

      Een van die beste geskenke wat jy jou verhouding kan gee, is om jou waarhede – jou gedagtes en gevoelens – te deel.

      ’n Ware gesprek is een waar twee mense hulle gedagtes en gevoelens eerlik en met sorg deel. Die beste gesprek wat jy kan hê, sal jou verhouding van ’n gevoel van afstand na ’n hegte band neem, en van spanning na nabyheid.

      Een van die beste maniere om die nabyheid van ’n hegte band te ervaar, is om wat in jou kop en jou hart is te deel. Daardie gevoel van afstand en verwydering gaan oor alles wat jy nie sê nie, en veroorsaak die spanning in jou verhouding. Die verwydering wat jy ervaar omdat jy dinge nie eerlik deel nie, voel soos spanning in enige verhouding. Dié spanning is die lewe se konstante herinnering dat jy eerlik moet word. Die vinnigste manier om van hierdie onaangename spanning en gevoel van verwydering ontslae te raak, is om julle waarhede te deel. Die gevoel van verwydering is dus jou uitnodiging om te deel wat jy op die hart het.

      Wat jy nie vir jouself en die mense om jou sê nie, skep die afstand en verwydering wat jy voel.

      Al jou gedagtes en gevoelens wat vir jou saak maak en wat jy nie deel nie, veroorsaak die spanning en afstand wat jy in jou verhouding ervaar. Daardie woorde wat jy nie sê nie, sit tussen julle soos ’n rots op ’n smal paadjie. Julle kan mekaar nie sien nie, want daar is so baie in die pad. Wanneer julle oor daardie rots begin praat, begin julle die pad na nabyheid oopmaak.

      Wanneer jy jou waarhede deel, maak jy jou vry van die swaar las van emosies en gedagtes wat jy so lank vir jouself moes hou. Dit verander die ervaring van jou verhouding. Ons is vir eerlike, hegte bande gemaak, daarom is ons verplig om te deel wat in ons kop en ons hart aangaan. Selfs al is dit soms pynlik om die waarheid te hoor, het eerlikheid ’n kragtige, bevrydende uitwerking. Saam met die pyn of seermaak van die waarheid kom verligting, en dan beweeg jy nader aan ’n sterker band. Ware verhoudings is altyd eerlike verhoudings.

      Een van die belangrikste doelwitte van enige verhouding is om te sê wat jy op die hart het – om jou waarhede met sorg te deel. Gelukkige paartjies deel dit wat in hulle hart en kop aangaan met sorg en eerlik, en baie gereeld.

      Die beste manier om te sê wat jy op die hart het, is om dit eerlik, taktvol en met deernis te doen.

      Dit is nie maklik om die waarheid oor jouself, jou verhoudings en jou lewe te praat nie, maar ons kan nie anders as om te deel wat in ons hart en kop aangaan nie. Sodra jy die moed het om uit jou hart te praat, gee jy ’n tree weg van die gevoel van verwydering in die rigting van ’n