Хоhооннор. Артемий Афанасьев

көтүттэ.

      Суолга ньалҕарыйбыт чалбах

      Сүттэ-хатта түргэнник,

      Салгын утаппыт курдук

      Супту обордо барытын.

      Сылы кыстаабыт тайҕам

      Сүгэн турбут хаарын

      Сиксийэн түһэрдэ санныттан,

      Сууммут курдук сананна.

      Сааһырбыт, хаппыт мутуктар

      Сааскы тыалтан тоһуттан,

      Сыа хаарга баттатан,

      Саһар-сүтэр буоллулар.

      Сааскы тыал сэрэхтээх

      Сүөргүлээбитин алдьатар,

      Сүһүөххүн, сүрэххин тоҥорон

      Супту үрэр идэлээх.

      Сааскы тыал барахсан,

      Сипсийэр саҥа кэм иһэрин,

      Сиппийэн ыраастыыр сыллата

      Сис тыаны, сыһыыны.

      Сатал. 09.04.2019

      Санаа күүһэ

      Санаа көҥүл көтөр,

      Санаа күүс эбэр,

      Санаа кэрэҕэ сирдиир,

      Санаа – арахсыбат доҕор.

      Санаа ситимигэр уйдаран

      Сири-дойдуну көрөбүт,

      Сылы-күнү уҥуордаан

      Сүппүтү, ааспыты булабыт.

      Санааҕыт ыраны үөскэттин,

      Сырдык суолунан сиэттин

      Сылайбакка-сыппаабакка

      Саҥаттан саҥа үрдэллэргэ.

      Санааттан ордук көҥүл,

      Санааттан ордук күүстээх,

      Сокуонунан хаарчахтаммат

      Суох бу орто дойдуга.

      Саҥа үүммүт күҥҥэ

      Санааҕытын сааһылааҥ,

      Салгыы айа-тута

      Сылайбакка айаннааҥ.

      Сатал. 14.04.2019

      Саас иһэр

      Хаар чарааһаата,

      Харалдьыт таҕыста,

      Халлаан да сылыйда,

      Хамсаныы түргэтээтэ.

      Сааһыт эрэттэр

      Сүһүөхтэрэ оонньоото,

      Сүгүн утуйар

      Сүттэ бу күнтэн.

      Сир аайы мустуу,

      Сааны, сэби ыйытыы,

      Сүбэһит да элбэҕэ

      Сөхтөрдө букатын.

      Саалаах эрэ барыта

      Сирдээх эбээт бэйэтэ,

      Сөбүлээн бүгэр

      Сааскы хаар уулаах.

      Сарсыардааҥҥы дьыбарга

      Сыҥаах тыаһыыр кэмнэрэ,

      Сүппэт үтүө өйдөбүл

      Сылаанньытар дууһаны.

      Күммүт үөһэ ойуута

      Мууһунан чарчыйбыт ууга

      Мороду дохсун үөрэ

      Моһуоктуура дьиктитин.

      Ону санаан сүрэхпит

      Омуннаахтык мөҕүстэ.

      Олорор, турар умнулунна,

      Оҥостуу саҕаланна.

      Дьокуускай. 16.04.2019

      Сааскы муус

      Сааскы мууска кииримэ,

      Саарбаҕа элбэх буолааччы,

      Сатанар буоллаҕына тумун,

      Сээбэҥниир түбэлтэҕэр сананыма.

      Сир кыыла барахсан

      Сааскы хоборго букатын

      Санаммат эбээт кырдьыга,

      Ситэн сиэри гымматахха.

      Саха оҕонньотторо былыр

      Сүбэ кэриэтэ сэрэтэллэрэ:

       Сааскы тыалга үрдэриэҥ,

      Сиикэй мууска кииримэ.

      Сааспыт барахсан саарбаҕа

      Сатаан өйдөөн сырыттахха,

      Сүрэҕи көнньүөрдэр кэрэтэ

      Сөҕүмэр элбэҕэ сөхтөрөр.

      Сатал.