Hammie. Ronelda S Kamfer

lewens

      daar was ’n vrou in my lewe

      wie so baie verraai was

      dat haar hart ’n sirkel was

      sy het haar vernederings

      saam met haar badolie

      in haar vel gevryf

      sy was my ma

      en sy het my geleer

      hoe om nie lief te wees

      vir myself nie

      Nathan

      ek sit en wag

      in die ICU

      langs my ma se bed

      my ma gaan dood

      my ma is dood

      Nathan

      het ’n song

      op my phone gesit

      wat hy insist ek moet luister

      sodra ek by die hospitaal kom

      tannie Margot en Liesel sms

      elke paar minute

      hulle wil nie wag vir die oproep nie

      hulle wil daar wees

      hulle wil hulself in my kop sit

      om te keer dat ek my kop verloor

      die verpleegster kom en vra

      of sy gou my ma

      kan gemaklik maak

      ek gaan lê op ’n bank

      in die wagkamer

      sit my earphones in en begin

      Nathan se song luister

      in the still of the night,

      in the world’s ancient light

      ek voel asof die klank in

      die wêreld sag gedraai is

      by die einde van die song

      wag ek nie meer vir die dood nie

      ek wag vir hom

      om langs my te kom staan

      vandag was veronderstel

      om ’n boring dag te wees

      ek en my ma was van plan

      om my babaklere uit

      die lay-by te gaan haal

      Immigrant

      die dag toe ons trek uit Eersterivier uit

      was ek veronderstel om happy te wees

      ek het gedink as ek net uit daai plek kan kom

      sal die lewe beter wees

      ek het als omtrent dit gehaat

      die gangsters

      die taxis

      die man by die winkel

      met die gun

      die childless couple wat lekkers verkoop het

      die maer man met die motorbike wat langs ons gebly het

      die stukkende karre

      die ou mense in werksklere

      tot ons in Blackheath gaan bly het

      toe haat ek al

      die wannabe gangsters

      die ver stap vir taxis

      die man by die winkel

      met die Bybel

      die newlywed couple wie se pa

      vir hulle ’n sesslaapkamerhuis gekoop het

      die ou vrou wat alleen gebly het

      die blink duur karre

      die ou mense in hulle lawn chairs

      en ek kon nie wag om daar uit te kom nie

      Kinderrympie

      mens kan net iemand

      vir wie jy lief is

      seermaak

      die res is self-mutilation

      Overberg

      gisteraand het ek gedroom

      my ma was by haar eie begrafnis

      sy het opgelet

      dat die dood in ’n familie

      net soos die lewe in ’n familie is

      my antie wat jare al kwaad is vir my

      ma huil die hardste

      my ouma sit iewers agter

      tussen die familie

      wat van ver af kom

      ek staan op

      gaan lees ’n gedig

      want dis al wat ek het

      om vir haar te gee

      Bang

      drie dae lank is my ma dood

      die aarde het drie keer

      om sy eie as gedraai

      totdat my ma

      ophou bestaan het

      Fluit-fluit in kamer 3

      vir my suster se twenty-first

      besluit ons om te gaan club

      midweek dead broke

      met genoeg weed in ons systems

      om ’n paar jaar

      in die tronk op te eindig

      ek wil nie saamgaan nie

      ek is al een wat ’n steady job het

      ek moet 4 o’clock opstaan

      vir ’n vol taxi

      ek kan nie high gaan werk nie

      but nou sit ek in die kar

      Celine Dion on blast

      my suster drink Smirnoff vodka

      uit die bottel

      ek is paranoid sit met

      my kop in my hande

      in die club is net 5 mense

      ons dans as if no one is watching

      die dj gee ’n shout out

      ek skrik by die huis in die toilet

      wakker

      die taxi hoet buite

      ek was trek aan en gaan werk

      iemand skree fluit-fluit in kamer 3

      ek kry ’n pasiënt wat op sy laaste is

      ek sit en probeer om nie aan die slaap te raak nie

      en ek hoop my pasiënt gaan nie dood

      voor my shift verby is nie

      Scream

      toe ek jonger was

      was daar ’n deel van my

      wat gewens het ek was

      ’n child of divorced parents

      somehow het my ouers se marriage

      my