La terrible et merveilleuse vie de Robert le Diable. Unknown

luy disoit. Pour dieu Robert laissez la jouste / car vostre Pere a fait crier que chascun cesse pource que maint preudhomme y a perdu la vie dont il est courroucé / Mais robert qui estoit eschauffé & quasi hors du sens / ne tenoit compte de chose qu'on luy dit / ains de pis en pis navroit & tuoit ceulx qu'il rencontroit. Tant fist Robert q^ue le peuple qui la estoit s'esmeut / et tout esmeut vint vers le Duc disant. Seigneur duc c'est grant folie de souffrir a vostre filz Robert de faire ce que il fait / Pour dieu mettez y remede.

      ¶ Comme Robert s'en alla au pays de Normandie robant & pillant tout le pays / forçant et destruisant femmes et violant pauvres filles pucelles

      Quand robert vit que il n'y avoit plus p^ersoⁿne aux joustes / il partit de la & alla a son adveⁿture par le pays & commença a faire grans maulx plus que jamais n'avoit fait: car il efforça femmes & viola pucelles sans no^mbre: il tua tant de geⁿs que ce fut pitié et n'y avoit ho^mme en Normandie que par robert ne fust desrobé et outragé / mesmemeⁿt il pilloit les eglises & si leur faisoit guerre: et n'y avoit abaye autour le pays de Normandie q^ue Robert ne fist pillier les nouvelles des faitz de robert furent racomptez au Duc / et tous ceulx q^u'il avoit batus et destruis se venoient plaindre au duc & luy comptoient les meffaitz que Robert faisoit par le pays de Normandie / l'un disoit / monseigneur vostre filz robert a efforcé ma femme / l'autre disoit il a violé ma fille / et l'autre disoit il m'a desrobé et pillé / et l'autre disoit il m'a batu et navré / or estoit piteuse chose a ouyr compter les maulx que faisoit Robert. Le duc qui oyoit dire ces choses de son filz robert / de grand dueil qu'il avoit en son cueur se print a plorer & dit / beau sire Dieu de Paradis j'ay eu si graⁿd joye & estoit tout mon plaisir d'avoir un filz pource que j'esperois en avoir grand soulas et joye. Or j'en ay un leq^uel me fait tant de douleur et de tristesse que je ne sçay que je dois faire.

      ¶ Comme le duc de Normaⁿdie envoya gens pour prendre son filz Robert: ausquelz Robert creva les yeulx

      Il y avoit un chevalier qui estoit la & voyaⁿt le duc en si grand douleur il dit: Monseigneur je vous conseille que mandez Robert et le faictes venir devant vous et en la presence de toute vostre cour & luy deffendez qu'il ne face mal a personne ou autrement vous luy direz que le ferez emprisoⁿner & si ferez faire de luy justice. A ce s'acorda le Duc et dit que le chevalier avoit bieⁿ parlé: et incoⁿtinent envoya gens par le pays chercher Robert et leur co^mmanda que il fust amené devant luy robert qui estoit par le pays sceut les nouvelles que le peuple s'estoit plaint a son pere et avoit commandé qui fust prins et mené vers luy et tous ceulx que robert rencontroit: et mesmement aux messagers du duc il leur crevoit les yeulx par despit de son pere qui les avoit la envoyez Et quaⁿd il les avoit ainsi fait aveugles il leur disoit par grand mocquerie: Galans vous en dormirez mieulx allez et dictes a mon pere que je ne le prise guere et q^ue par despit de luy et de ce qu'il m'a mandé je vous ay les yeulx crevez & ainsi le devez croire p^ar quoy Robert estoit hay de Dieu et du monde. La vie et fame de luy estoit divulguee par tout le monde. Les messagers qui par le duc avoient esté envoyez querir Robert retournerent plorant devaⁿt le duc & luy dirent Voyez seign^eur duc comme vostre filz nous a aveuglez et mal atournez. Le duc fut courroucé des nouvelles qu'il ouyt par ses messagers & co^mmença a penser qu'il pourroit faire: & comme il en pourroit chevir.

      ¶ Comme le Duc de Normandie fist faire un commandement par tout son pays que robert fust prins et mis en prisoⁿ luy et ses compagnons

      Lors un de son conseil se leva et dit au Duc: Seigneur ne pensez plus a cecy / car je vous asseure que veu la rebellion de robert et de ce q^u'il a fait aux pauvres messagers jamais ne revieⁿdra vers vous: Mais est necessaire de le pugnir des maulx et homicides lesquelz il a faitz et perpetrez et ainsi le trouvons nous aux loix et droitz escriptz ainsi raison le veult et le doit faire. Le Duc estoit sage si voulut user de son conseil: & incontinent envoya par toutes les ville de sa duché crier et publier & faire exprés co^mmandemens de par luy a tous sergeⁿs justiciers & officiers qu'ilz fissent diligence de prendre robert et iceluy prins le garder & enfermer & tout ceulz qui estoieⁿt avec luy & qui a mal faire luy tenoieⁿt compagnie. Cest edit fait & publié p^ar le duc: Ledit edit vint tantost a la cognoissance de Robert & quand il le sceut a peu qu'il n'enragea de dueil & peu s'en faillit que il ne yssit hors du sens et aussi semblablement les meurtriers lesquelz estoient en la compagnie de Robert furent espouentez et de la criee que le Duc avoit faicte eurent grand paour: Robert quasi enragé & hors du seⁿs estraignoit les dentz et jura qu'il feroit guerre a son pere et q^u'il destruiroit son lignage: car le diable enhortoit Robert a ce faire.

      ¶ Comme robert le diable fist faire une maison en un graⁿd boys tenebreux et obscur & la fist des maulx sans nombre

      Aprés ces choses dessusdictes ouyes par Robert / il fist faire une maison forte en un boys en un lieu tenebreux et la alla robert faire sa demourance / et estoit le lieu quasi inhabitable / merveilleux / espouentable / estrange & hideux et avec ce le plus perilleux que lon sçauroit peⁿser ne dire: robert fist assembler avec luy tous les plus mauvais garsons du pays et iceulx retint pour le servir et acompagner: car il y avoit gens mauvais de terribles & diverses sortes / comme larrons / meurdriers: escorcheurs / geⁿ