The Witches of Traquair and Other Tales from Scottish Highlands. James Hogg

they have, that I can see, is to abandon their farms in time, and try to save a remnant. Things will come to their true level presently, but not afore the auld stock o' farmers are crushed past rising again. And then I little wat what's to come o' ye; for an we herds get the land, we winna employ you as our shepherds,—that you may depend on."

      "Well, Andrew, these are curious facts that you tell me about the land having all changed occupiers about a certain period. I wish you could have stated the causes with certainty. Was there not a great loss on this farm once, when it was said the burn was so dammed up with dead carcasses that it changed its course?"

      "Ay, but that's quite a late story. It happened in my own day, and I believe mostly through mischance. That was the year Rob Dodds was lost in the Earney Cleuch. I remember it, but cannot tell what year it was, for I was but a little bilsh of a callant then."

      "Who was Rob Dodds? I never heard of the incident before."

      "Ay, but your father remembered it weel; for he sent a' his men mony a day to look for the corpse, but a' to nae purpose. I'll never forget it; for it made an impression on me sae deep that I couldna get rest i' my bed for months and days. He was a young handsome bonny lad, an honest man's only son, and was herd wi' Tam Linton in the Birkhill. The Lintons were sair come down then; for this Tam was a herd, and had Rob hired as his assistant. Weel, it sae happened that Tam's wife had occasion to cross the wild heights atween the Birkhill and Tweedsmuir, to see her mother, or sister, on some express; and Tam sent the young man wi' her to see her ower Donald's Cleuch Edge. It was in the middle o' winter, and, if I mind right, this time sixty years. At the time they set out, the morning was calm, frosty, and threatening snaw, but the ground clear of it. Rob had orders to set his mistress to the height, and return home; but by the time they had got to the height, the snaw had come on, so the good lad went all the way through Guemshope with her, and in sight of the water o' Fruid. He crossed all the wildest o' the heights on his return in safety; and on the Middle-End, west of Loch-Skene, he met with Robin Laidlaw, that went to the Highlands and grew a great farmer after that. Robin was gathering the Polmoody ewes; and as they were neighbours, and both herding to ae master, Laidlaw testified some anxiety lest the young man should not find his way hame; for the blast had then come on very severe. Dodds leugh at him, and said, 'he was nae mair feared for finding the gate hame, than he was for finding the gate to his mouth when he was hungry.'—'Weel, weel,' quo' Robin, 'keep the band o' the hill a' the way, for I hae seen as clever a fellow waured on sic a day; and be sure to hund the ewes out o' the Brand Law Scores as ye gang by.'—'Tammy charged me to bring a backfu' o' peats wi' me,' said he; 'but I think I'll no gang near the peat stack the day.'—'Na,' quo' Robin, 'I think ye'll no be sae mad!'—'But, O man,' quo' the lad, 'hae ye ony bit bread about your pouches; for I'm unco hungry? The wife was in sic a hurry that I had to come away without getting ony breakfast, and I had sae far to gang wi' her, that I'm grown unco toom i' the inside.'—'The fient ae inch hae I, Robie, my man, or ye should hae had it,' quo' Laidlaw.—'But an that be the case, gang straight hame, and never heed the ewes, come o' them what will.'—'O there's nae fear!' said he, 'I'll turn the ewes, and be hame in good time too.' And with that he left Laidlaw, and went down the Middle-Craig-End, jumping and playing in a frolicsome way ower his stick. He had a large lang nibbit staff in his hand, which Laidlaw took particular notice of, thinking it would be a good help for the young man in the rough way he had to gang.

      "There was never another word about the matter till that day eight days. The storm having increased to a terrible drift, the snaw had grown very deep, and the herds, wha lived about three miles sindry, hadna met for a' that time. But that day Tam Linton and Robin Laidlaw met at the Tail Burn; and after cracking a lang time thegither, Tam says to the tither, just as it war by chance, 'Saw ye naething o' our young dinnagood this day eight days, Robin? He gaed awa that morning to set our gudewife ower the height, and has never sin' that time lookit near me, the careless rascal!'

      "'Tam Linton, what's that you're saying? what's that I hear ye saying, Tam Linton?' quo' Robin, wha was dung clean stupid wi' horror. 'Hae ye never seen Rob Dodds sin' that morning he gaed away wi' your wife?'

      "'Na, never,' quo' the tither.

      "'Why then, sir, let me tell ye, you'll never see him again in this world alive,' quo' Robin; 'for he left me on the Middle-End on his way hame that day at eleven o'clock, just as the day was coming to the warst.—But, Tam Linton, what was't ye war saying? Ye're telling me what canna be true—Do ye say that ye haena seen Rob Dodds sin' that day?'

      "'Haena I tauld ye that I hae never seen his face sinsyne?' quo' Linton.

      "'Sae I hear ye saying,' quo' Robin again. 'But ye're telling me a downright made lee. The thing's no possible; for ye hae the very staff i' your hand that he had in his, when he left me in the drift that day.'

      "'I ken naething about sticks or staves, Robin Laidlaw,' says Tam, looking rather like ane catched in an ill turn. 'The staff wasna likely to come hame without the owner; and I can only say, I hae seen nae mair o' Rob Dodds sin' that morning; and I had thoughts that, as the day grew sae ill, he had hadden forrit a' the length wi' our wife, and was biding wi' her folks a' this time to bring her hame again when the storm had settled.'

      "'Na, na, Tam, ye needna get into ony o' thae lang-windit stories wi' me,' quo' Robin. 'For I tell ye, that's the staff Rob Dodds had in his hand when I last saw him; so ye have either seen him dead or living—I'll gie my oath to that.'

      "'Ye had better take care what ye say, Robin Laidlaw,' says Tam, very fiercely, 'or I'll maybe make ye blithe to eat in your words again.'

      "'What I hae said, I'll stand to, Tam Linton,' says Robin.—'And mair than that,' says he, 'if that young man has come to an untimely end, I'll see his blood required at your hand.'

      "Then there was word sent away to the Hopehouse to his parents, and ye may weel ken, master, what heavy news it was to them, for Rob was their only son; they had gien him a good education, and muckle muckle they thought o' him; but naething wad serve him but he wad be a shepherd. His father came wi' the maist pairt o' Ettrick parish at his back; and mony sharp and threatening words past atween him and Linton; but what could they make o't? The lad was lost, and nae law, nor nae revenge, could restore him again; sae they had naething for't, but to spread athwart a' the hills looking for the corpse. The haill country rase for ten miles round, on ane or twa good days that happened; but the snaw was still lying, and a' their looking was in vain. Tam Linton wad look nane. He took the dorts, and never heeded the folk mair than they hadna been there. A' that height atween Loch-Skene and the Birkhill was just moving wi' folk for the space o' three weeks; for the twa auld folk, the lad's parents, couldna get ony rest, and folk sympathized unco muckle wi' them. At length the snaw gaed maistly away, and the weather turned fine, and I gaed out ane o' the days wi' my father to look for the body. But, aih wow! I was a feared wight! whenever I saw a bit sod, or a knowe, or a grey stane, I stood still and trembled for fear it was the dead man, and no ae step durst I steer farther, till my father gaed up to a' thae things. I gaed nae mair back to look for the corpse; for I'm sure if we had found the body I wad hae gane out o' my judgment.

      "At length every body tired o' looking, but the auld man himsell. He travelled day after day, ill weather and good weather, without intermission. They said it was the waesomest thing ever was seen, to see that auld grey-headed man gaun sae lang by himsell, looking for the corpse o' his only son! The maist part o' his friends advised him at length to give up the search, as the finding o' the body seemed a thing a'thegither hopeless. But he declared he wad look for his son till the day o' his death; and if he could but find his bones, he would carry them away from the wild moors, and lay them in the grave where he was to lie himsell. Tam Linton was apprehended, and examined afore the Sheriff; but nae proof could be led against him, and he wan off. He swore that, as far as he remembered, he got the staff standing at the mouth o' the peat stack; and that he conceived that either the lad or himsell had left it there some day when bringing away a burden of peats. The shepherds' peats had not been led home that year, and the stack stood on a hill-head, half a mile frae the house, and the herds were obliged to carry them home as they needed them.

      "But a mystery hung ower that lad's death that was never cleared up, nor ever will a'thegither. Every man was convinced, in his own mind, that Linton knew where the body was a' the time;