Noudat slapende honde. Ronelda S Kamfer

      

      Titelblad

      RONELDA S KAMFER

      KWELA BOEKE

      Opdrag

      Vir Mammie, Dad en Allisen

      Ná alles is familie al wat sin maak

      Motto

      I’m just a red nigger who love the sea,

      I had a sound colonial education,

      I have Dutch, nigger, and English in me,

      and either I’m nobody, or I’m a nation . . .

      – Derek Walcott, “The Schooner Flight ”

      well

      it’s interesting what does go on,

      and what doesn’t go on

      that should,

      and the world’s quite a sight

      spun through spiders and webs

      that catch us half asleep

      and do us in

      before we’re even old enough

      to know we’re through . . .

      – Charles Bukowski, “A Minor Impulse to Complain”

      Waar ek staan

      Nou sit ek om ’n tafel

      met my voorvaders se vyande

      Ek knik en groet bedagsaam

      maar

      êrens diep binne my

      weet ek waar ek staan

      My hart en kop is oop

      en soos goed opgevoede mense

      lag en eet ons saam

      maar

      êrens diep binne my

      weet ek waar ek staan

      Klein Cardo

      Vir Alfonso Cloete en Velencia Farmer

      They say it’s the white man I should fear, but it’s my own kind doing all the killing here. – Tupac Amaru Shakur

      Cardo was gebore

      maar niemand het hom verwag nie

      sy ma was sestien

      en sy pa gemeenskapsbouer vannie jaar

      sy ouma was ’n cashier

      en sy stiefoupa het gedrink virrie pyn

      Cardo was ’n mooi klong

      met ’n donker vel en ligte oë

      mooi genoeg om Engels te praat

      hy’t gehou van drie stokkies

      en vrottie eier innie pad speel

      Tietie Gawa vannie mobile het gesê

      Cardo was ’n engelkind

      Die aand voor Cardo se eerste dag

      op grootskool

      het die Schoolboys klappers innie pad geskiet

      Cardo het by die venster uitgeloer

      die koeël het in sy keel gaan sit

      sy ma hettie gehuil nie

      die politicians het ’n boompie geplant

      en die Kaapse Dokter het hom uitgepluk

      en gegooi waar die res

      vannie Kaap se drome lê –

      oppie vlaktes

      Noudat slapende honde

      Noudat slapende honde wakker is

      en ek my helde in rock n roll en gangsta-rap gevind het

      jaag die meid my nog steeds soos ’n skadu

      Noudat ek Afrikaans praat

      en ek die labels van my klere afgeknip het

      soek die verlede my nog steeds in die reën

      Noudat ek oud genoeg is om te verstaan

      en te jonk is om te onthou

      Nou! word ek eers remind

      Noudat ek net mense sien

      en my tekort aan kuns en kultuur

      my harregat gemaak het

      nou’s ek goed genoeg

      om deel te wees van die stelsel

      Noudat my ouers van my hou

      en ek die Happy Hotnot-mentality

      opgebom het

      nou’s ek ’n fokken hero

      Maar saans

      net voor ek gaan slaap

      smeek ek die donkerte

      om my weer bang te maak

      die baas van die plaas

      vir Mammie

      ek het ’n ouma

      wat net een taal praat

      sy vertel my stories van baas Willem

      en dr. Metzler

      hoe goed baas Willem vir haar was

      sy kon altyd eerste kies

      watter ou klere sy wou hê

      sy vertel van myle stap dorp toe

      en hoe baas Willem haar voor

      in die bakkie laat sit het

      baas Willem het gesê haar kinders

      hoef nie die standerd 10 te maak nie

      hulle gaan mos op die plaas werk

      en help met die kinders grootmaak

      dr. Metzler het gesê

      my ouma se kinders confuse hom

      hulle’t ’n immorality in hul oë

      hy sê my ouma kan dankie sê

      die laaste een is doodgebore

      daai een se naam

      sou Judas gewees het

      ’n gewone blou Maandagoggend

      dit was ’n gewone blou Maandagoggend

      êrens het ’n ma haar kind se lyk gaan uitken

      ek het my gewas, tande geborsel en my bio-taak afgehandel

      op die yskas was ’n briefie van my ma

      wat vra dat ek tog nie die breyani so sterk moet maak vanaand nie

      my sussie het haar sokkies gesoek en by halfag het ek die voordeur gesluit

      en die sleutel op die ou plek gaan wegsteek

      by die huiswinkel het ek twee los sigarette gekoop

      en in my sokkie weggesteek

      op die hoek van Wildflower- en Rosestraat

      het ’n meisie saam met haar toekomstige moordenaars gejoke

      in my kop het Dylan Thomas geskreeu

      do not