Kventin Dorvard. Вальтер Скотт

şübhələndiyi üçünmü, ya nədənsə əsgərlərinə işarə etdi ki tərpənməsinlər. Leslidən soruşdu ki, o, nə haqla cinayətkarı müdafiə edir.

      – Sizin ittihamınız yalandır. Unutmayın ki, Şotlandiya nişançılarına xüsusi imtiyazlar verilmişdir. Yaşasın kral Lüdovik!

      Qaraqabaq adam dedi:

      – Axı bu oğlan nişançı deyil!

      – O mənim bacım oğludur! – Çapıq təntənəli əda ilə deyib səsini ucaltdı və and içdi ki, elə bu gün onu öz məiyyətinə daxil edib.

      Qaraqabaq adam inad etdi:

      – Amma hər halda, hər şeyi krala ərz edəcəyəm, bu mənim vəzifəmdir.

      O bunu deyib atını çapdı, dəstəsi də onun dalınca getdi. Nişançılar bundan sonra nə edəcəkləri barədə müzakirəyə başladılar:

      – Öncə gərək bunları rəisimiz Krouforda ərz edib oğlanı siyahımıza salaq.

      – Cənablar, bir məni dinləyin, – Kventin dedi, – axı mən hələ bu haqda qərar verməmişəm.

      – Onda birdəfəlik qət elə ki, asılmaq istəyirsən. Qabaqcadan deyirəm, səni xilas etməyin başqa yolu yoxdur.

      Kəndirdən qurtulan Kventinə bu vəziyyətdə ən acınacaqlı təklif də edilsəydi, razılaşardı.

      – Dayıcan, olarmı bu gecə mehmanxanada qalım? – Dorvard dedi.

      – Səni sabaha sağ buraxmazlar. Prevo gedəndə boş yerə gülümsəmədi, bu, pis əlamətdir. Onun nəsə fikri var.

      – Məsləhət görürəm ki, elə günü bu gün kralın bərbəri Olivye ilə görüşəsən. O, həmişə bizə dost olub. Həm də o, kralla prevodan qabaq görüşəcək, çünki sabah onun üzünü qırxacaq, – Kanningem dedi.

      – İndi birbaş qəsrə, uşaqlar!

      VII fəsil

      Kral qvardiyasının nişançısı

      Kventin xidmətçilərdən birinin atına mindi. Kralın qəsrinə sarı yönəldi. Yolda dayısının sorğu-sualına cavab olaraq səhərki əhvalatı ətraflı danışdı.

      Onlar qəsrə çatıb bir-birinin ardınca darvazadan içəri girdilər.

      Sıra Kventinə çatanda növbətçilər nizələrini çarpazlayıb durmasını əmr etdilər. Qala divarları üstündən oxlar tuşlandı. Bacısı oğlunun yanında qalan Çapıq Lüdovik lazımi izahatı verdikdən sonra Dorvardı keşikçi dəstəsinin nəzarəti altında Kroufordun olduğu binaya ötürdülər.

      Şotlandiya zadəganlarından olan Krouford qanlı müharibələrdə VI Karla sədaqətlə xidmət etmişdi. İngilisləri Fransa torpaqlarından qovmuş şanlı Şotlandiya lord və cəngavərlərinin sağ qalmış son nümayəndələrindən idi. Hələ gəncliyində Janna d‘Arkın bayrağı altında vuruşmuşdu. Xasiyyəti və sədaqəti ilə kral ya- nında böyük nüfuz sahibi olmuş, sarayda yüksək mövqe tutmuşdu.

      Çapıq Lüdovik Dorvardın və onu ötürən keşikçilərin ardınca öz rəisinin olduğu binaya girdi.

      Ucaboy, gümrah və arıq olan lord Krouford xeyli yaşlansa da, qüvvəsini qoruyub saxlamışdı. Gündən yanmış üzündə xeyli çapıq vardı. Uca, dik vücudu gen xalata bürünmüşdü. Belində zəngin bəzəkli qını olan xəncər, boynunda müqəddəs Mixail ordeni olan lent asılmışdı. Gözlüyün köməyi ilə kral Lüdovik tərəfindən yazılmış əlyazmanı oxuyurdu.

      Onlar içəri girəndə lord əlyazmanı kənara qoyub narazılıqla dedi:

      – Lənət şeytana, yenə mənə işiniz düşüb?

      Çapıq Lüdovik hadisəni ətraflı şəkildə danışdı. Lord Krouford dedi:

      – Bu cür əhvalatlarla mənim yanıma hələ çoxmu gələcəksiniz? Yad ölkədə qulluq edən əsgər özünü təvazökar və ədəbli aparmalıdır ki, həyət itləri üstünə hürməsinlər. Ancaq bacın oğlunu sənin müdafiə etməyin təbiidir. Qoymarıq o qoçağı incitsinlər. Siyahıları mənə verin, onun adını siyahıya yazaq ki, bizim imtiyazlardan istifadə edə bilsin.

      Dorvard danışmaq istədi:

      – İcazə verin, hörmətli cənab…

      Amma dayısı tez onun sözünü kəsdi:

      – Dəlisən? Rəis həzrətlərinin icazəsi olmadan danışmağa necə cürət edirsən?

      Lord dedi:

      – Qızışma, Lüdovik, qoy görək nə deyir.

      – Bu qvardiyaya girməkdə bir az tərəddüd edirəm, dayım da bilir. İndisə nəcabətli və təcrübəli rəisi gördükdən sonra onun komandanlığı altında xidmət etməyə şübhəm qalmadı, çünki sizə qarşı dərin hörmət hissi duydum.

      – Kventin, sən kral Şotlandiya qvardiyasının fəxri dəstəsinə daxil oldun. Səni dayının silahdaşıyanı təyin edirəm, o artıq sənin rəisindir. Lüdovik, ona göz qoy ki, hərbi təlimlə ciddi məşğul olsun. Bu günlərdə düşmənlə üz-üzə gələcəyik.

      – Qılınca and olsun ki, bu, şad xəbərdir! – Çapıq dedi.

      Adət üzrə, dəstənin sıralarına yeni yoldaş daxil olanda onun şərəfinə veriləcək qonaqlığa hazırlıq başladı. Bu münasibətlə Şotlandiya nişançılarının yeməkxanası səliqəyə salındı. Divarları Şotlandiya bayraqları və düşmənlərdən alınmış bayraqlarla bəzədilər.

      Sonra Kventin üçün lazım olan rəsmi geyim və silah tapmağa çalışdılar ki, o da qonaqlığa əsl şotlandiyalı nişançı kimi gəlsin.

      Qonaqlıq əla keçdi. Şənliyin qızğın yerində lord Krouford gəlib çıxdı. Qoca əsgərin gəlməsi şənliyi daha da qızışdırdı.

      – Qulaq asın, dostlar! – qoca dedi, – Burqundiya hersoqu Karldan elçi gəlib. Elçinin gətirdiyi ismarış heç də sülhməramlı deyil. Sərhəddə baş verən toqquşmalar hersoqun narazılığına səbəb olub. Odur ki kral onu öz qəsrində qəbul etməkdən imtina edib. Başlıcası isə kral bu yaxınlaradək hersoqun rəiyyəti olan adlı-sanlı gənc bir qrafinyanı öz himayəsinə alıb. Hersoq həmin qrafinyanı öz dostuna ərə vermək istəyirmiş. Qohumlarından qoca qrafinya da onunla bura gəlməyə razı olub.

      – Yəqin, bu gün növbədə ikən gördüyüm qız elə o imiş, – deyə nişançı Arno dilləndi. – Onu başqa bir xanımla örtülü kəcavədə qəsrə apardılar. Mənə dedilər ki, kəcavədə qəsrə aparılan bu iki xanım çox adlı-sanlı xanımlardır. Sən demə, neçə gündür ki, kral özü neçə dəfə gizlincə xanımların yanına gəlib onlara hörmət göstərib. İndisə xanımlar qəsrdə gizləniblər.

      – Bu gün mən qəsrdən heç vaxt eşitmədiyim ud və nəğmə səsləri eşitdim, – başqa bir nişançı dilləndi.

      Bu söhbətlər qonaqlıqdan sonra da Kventinin yadından çıxmadı. Bəlkə, elə Pyer dayıya qulluq edən gözəl qız haqqında danışılan qrafinyanın özüdür?